El bois des Berceux

Ah ! I v’la , c’Bois des Berceux, d’ où qu’i sont tous ces jux

Pour ammuser tout l’monn’, ces jonn’ et pi ces viux !

Il est bien reintouré aveuc enn’ grill’ èd fer ;

Es n’est pu comm’ edvant ; tout il étoit à l’air ;

In aroit dit qu’c’étoit des tchiot’ buquett’ èd trann’

Pi des treus tout partout, cousus tertout’ einsann’

Pou l’heur’ i’n a des port’ à ces coins dès gardin ;

In a peur dé y eintrer tell’ meint qu’ça vos surpteind.

In voit cor des viux bancs, usés, naturellemeint,

Où qu’in alloit s’assir pou passer sin tourmeint.

In étoit bien tranquil’ ! C’étoit miux qu’su en’ chais’.

Ah ! qu’il y faisoit bon ! Ah ! qu’in étoit bien ais’

Ed respirer l’air pur pad’ sous ces bieux boquets !

C’est là qu’in jacassoit comm’ des tchiot’ perroquets !

I n a des bell ‘ allées d’où qu’tou’s ces tchiot » bobonn’

I proumèn’t les moutards qu’i sont cor sans maronn’.

Là bàs, à droit’ deins c’coin, c’est un tit à l’fléquett’ ;

A côté, c’est c’ju d’pomm’ d’enn’ longueur sans pareil’ ;

In y jue à l’raquett’, à l’ball’, ein plein solel.

Quarante et chass’ passez, qu’i dit c’marqueu r’dressé

Ein courant tout du long comm’ un tchiot kien d’berger.

Quand i sont tout ein nage, ces jueux i sont r’crandis ;

I vont deins leu donjon ermett’ leus bieux habits.

Pus mon, c’est un baquet d’où ès jue à l’boul

Aveuc des morcieux d’bos gros comm’ enn’ tchiot’ citroul’ ;

In met un pied deins c’treu et pi l’eut’ su c’cimeint ;

In jett ‘ ès boul’ al roul’, èq ça va jolimeint.

C’est l’pus près dès tchiot cleu, qu’in a mis là comm’ but,

Qu’il a gaingné l’partie pi qu’i crie ; marqu’ un ju.

Mais un tchiot peu pus lon, c’est c’grand ju, c’est c’ju d’arc ;

Pou ceux qu’i veut’t tirer cor comm’ du temps d’Jeanne d’Arc ;

Ej vos dirai eut’ part quoi qu’in fait deins c’ju là.

Aujord’hui j’nai pon l’temps, j’en devrois pu êt’ là.

Ein r’v’nant in voit cell’ plac’ d’où qu’les jours èd drann’ fêt’,

In instal’ un parquet pou fair’ tourner ces têt’ ;

In y danse fet-i vir’ ; in boit, in cante, in crie,

Si bien qu’in voit tout l’monn’ réduit comm’ tchiot Carie.

Tout là bas c’est c’bieu kiosqu’ doù qu’in einteind l’musique

Juer pou ces reintchiers, ces ouvriers d’fabrique

Et pi ceux qu’ils l’acoutent. In fait des yux, d’s orell’,

In reuv’, tout rein r’gardant voler ces hirondrell’.

Mais çan qu’in ainme èl miux, surtout quant’i fait keud,

C’esyt c’chalet, c’batimeint qu’in y boit çan qu’in veut.

In s’erpose quètt minut’ ein buvant enn’ tchiot’ tasse ;

In feum’ enn’ bonn’ tchiot’ pip’, ça vos r’met l’cœur à place.

Quant’ in s’a bien r’posé, in quitt’ tout d’suit’ cell’ tab’

Pou fair’ dèl place à ceux qu’i r’vienn’t d’edsous ces ab’.

Cà vos sann’ toujours bon, meum si in est à deux….

In r’vient si volontchiers à c’viux Bois des berceux !

H.F. Carpentier, Rêveries d’un bohainois, transcription de Marcel Lefèvre