El CONSEILLER D’ ARRONDISS’MEINT

A Gaston J…

Eh bein ! camarad ! quoi qu’ t’ eins dis ?

Paroit qu’pou l’heur t’es bein conteint !

C’est l’s électeurs qu’i mèl l’ont dit :

T’es conseillier d’arrondiss’meint !

I va t’ falloir enn’ bell’ ceintur’,

Des gants d’ pieu pou mett’ su tes mains,

Des quenn çon, un qu’veu, enn voitur’ ;

T’es conseillier d’arrondiss’meint !

I feudra qu’ t’achèt’ des maronn’,

Eds habits pi tout l’ treimbelmeint,

Ed quoi r’nipper trenn’ six personn’ :

T’es conseillier d’arrondiss’meint !

T’as d’jà enn’ cravat’, des queuchett’,

Méfie it à ti pass, pou l’monteint,

Feut mett’ tin capieu deins t’queuett’ :

T’es conseillier d’ arrondiss’meint !

Tu vas fair’ pousser ces carott’

Ces pomm »éd terr’ – oh ! ça ! sur’meint !-

A tout’s ces fernèt’ pi ces port ‘ :

T’es conseillier d’arrondiss’meint !

Tèn sais pon qu’in dit tout partout

Eq tu pay’ à boir’. Ah guerdin !

Tu peux nos régaler tertout’ :

T’es conseillier d’arrondiss’meint !

C’est-i vrai qu’t’as promis d’l’andoull’,

Dèl tèt èd vieu, dèl seuc’, du vein’ ?

Tè d’vrois donner dèl ratatoull’ :

T’es conseiller d’arrondiss’meint !

H.F. Carpentier, Rêveries d’un bohainois ; transcription de Marcel Lefèvre