NO DRAPIEU

_____________________

A Léon L…….

Vos rappélez-vous bien çou qu’du temps d’vo congé,

I vos a l’pus frappé et pi sanné l’pu bieu ?

Mi j’mein souviens toujours, jé y ai d’jà bien songé ;

C’est quant in a moutré, pou l’preumier coeup c’ drapieu.

Deins l’cour è l no quartchier nos étins déqueindus.

Tout autour, ein carré, in nos avoit fait mett’.

I n’falloit pon bouger, pass’ c’ étoit défeindu ;

In n’avoit même pon l’droit d’éternuer enn’ miett’.

Su sin qu’veu, c’colonel, il arriv’ au tchiot trot.

I pass’ deins nous tertous, pardrièr’ pi pad’ vant,

Pour ergarder nos sacs et meum nos godillots ;

I reint’ deins no carré, i s’arrêt’ deins c’mitant.

Après avoir qu’mandé bayonnett’ au canon,

I dait v’nir ès drapieu, à geuch, à côté d’li ;

I nos espliqu’ çan qu’c’est qu’l’eimblemm’ èd no nation,

Dantzig, Castiglione, Friedland, Rivoli (1)

Quant’ il a eu fini, nous préseintons les armes ;

Es yeut,nant , aussitôt, i déploie no drapieu,

Min tchiot cœur i buquoit , ça m’faisoit v’nir des larmes ;

J’erseintois d’jà quitt’ cose, malgrès qu’jèn fuss qu’un bleu.

Tout juss à c’mommeint là v’là cell’ musiq’ qu’al jue :

Saluez l’bieu drapieu dès quater vingt septchième !

Ces tambours, ces clarons, i cantent comm’ à s’l’ervue ;

J’avois dèl chair èd poule ! èj n’ai pon pu m’ertchienne !

Il a follu qu’çà parte. Ej brayois comm’ un vieu ;

Ces larm’ découlint tout d’qu’ein bas dêm tunique ;

Ej n’avois, èd ma vie, janmais rien vu d’si bieu !

J’étois tout ertourné ein einteindant l’musique !

J’èn sais pon si çà fait l’meum’ effet à tout l’monn’

Mains , pou verser quitt’ larm’ i y ein avoit b »coeup.

Leuarrou ! J’ai idée qu’èj treurois les maronn’

A c’preumier qu’i vééroit insulter no drapieu !

______________________________________________________

(1) Batailles auxquelles a pris part le 87è régiment d’infanterie

(2) Et dont les noms sint inscrits sur le drapeau de ce régiment.