C’ L’ ÉGLISE

________________

Ej viens d’ vir’ ès l’ église ; c’est un viux monnumeint

Qu’i n’a pu guèr’ à viv’ èq pour un tchiot momeint.

In va n’ein fair’ enn’ neuv’ pass qu’edpu des einnnées

In r’ cueul des charités qu’ ces geins i’s ont données.

C’ l’ eddeins il est parel à c’ti dèl’s eut’ églises ;

I n’a rien d’ermarquab’ – in n’y voit meum’ pon d’ frises-

Es l’ estérieur non pu, c’est comm’ un ermitage.

Çà va canger bientôt, mains, çà n’ s’ra pon dommage !

I n a quitt’ cose èd rar’, tout d’ meum’, deins c’viux portal :

C’est tchiots hions ein pierr’, à ces coins d’ces vantal ;

I n’ paroi’t pu fort jonn’, comm’ i sont là à c’t’heur’ ;

I’s ont pu d’six cents ans, à çou qu’in nos asseur’.

Un tchiot peu ces prussiens i l’s arint démolis

Quant’ ein soixant’ et onz ‘, aveuc leu n’ artil’rie

Du côté dès portal i voolint fonn’ ès mur ;

I n’ont fait, par bonheur , qu’un treu à cell’ toitur’.

C’ cloquer il est trop tchiot, pou l’heur’ pou c’ batimeint ;

Mains, quoi qu’ c’est qu’ vos voolez, il a tombé pa l’ veint

El douz’ mars soixann’ seiz ‘, el jour dès l’ ouragan

Eq tout i culbutoit à l’vill’ pi deins ces camps

I n a cor assez d’ plac’ quant’ meum’, pou qu’ces trois cloqu’

I balonch’t ein sonnant. Ça fait berliqu’ berloqu’

Pou ceux qu’i cass’ t leu pip’, - c’est toujours malhéreux-

Pi pou ceux qu’in baptise, qu’in nomm’ des bienhéreux ;

Mains quant’ c’est un mariag’,^pou n’pon commett’ d’erreur,

I sonn’t un tchiot bonheur et pi un grand malheur !

I n a d’jà quitt’ einnées, in y a m’s enn’ horloge,

Comm’ça in peut savoir à quell’ heur’ qu’in déloge.

Tout çou qu’èj trouv’ èd miux c’est qu’un d’ces quat’ matins
Nos arons ; cor un coeup, un nouvieu monnumeint .

Si ça n’nos fait pon d’bien, çà n’f’ra pon d’ma’.

No vill’ al s’ra pu bell’, amon ? çà s’ra d’jà çà !

H.F. Carpentier, Rêveries d’un bohainois, transcription de Marcel Lefèvre