El FÊTE D’ESBONCOURT

___________________

Dang’reux qu’vos ez quitt’ fois été

A l’fêt’ dès pays d’à côté ;

Vos savez bien ? l’fêt’ d’Esboncourt

D’où ès qu’i n a du monn’ toujours ?

In n’ein voit tout d’meum’ pon bécoeup

Pou avoir autant d’visieus ;

I n’n a d’jà vu meum èd Monbr’hain !

Feut vos dir’ èq ceux d’min pays

I’s y vont toujours èl lindi,

A moins qu’à c’t’heur’ çà soiss cangé !

A l’erchinné in a congé

Deins tous ces bureux, ces fabriqu’,

Ces écol’ et pi ces boutiqu’.

Vit’ in s’habill’ pi, sans lampions,

In fil’ comm’ enn’ bann’ èd freumions ;

I feut qu’tout l’monn’ i voiss à l’fêt ‘

Pa cell’ port’ ou bien cell’ fernêt’.

In y va meinger du gambon

Et pi i boir’ quitt’ cose èd bon.

Après, in va fair’ enn’ proum’nad’,

Souvient aveuc des camarad’,

In fait l’tour d’hardimeint d’auberges

- C’n’est pon pou y alleumer des cierges-

Au soir ces jonn’ i vont au bal

S’esquinter pus qu’à leu traval ;

I s’erpos’t esdus c’roga-yot

Et pi i vont preinn’ un tchiot pot.

Quant’ tout chacun il est r’crandi

In s’ein r’va, qu’in n’est n’est pu l’lindi,

In arpeint’ ès qu’min tout douc’meint

Bras d’sus, bras d’sous, bien trinquil’meint ;

In fait quett’ fois des perlouett’ ;

In n’ s’aflol’ pon, c’est su c’l’herbett’ !

Comm’eint ein r’v’nant d’enn’ fêt’ èd famil’,

In reint’ et pi in dort tranquil’.

El pu bell’ fêt’ dè c’es aleintours

C’est, pour l’seur, èl fêt’ d’Esboncourt !

H.F. Carpentier, Rêveries d’un bohainois, transcription de Marcel Lefèvre