A L’ FOIRE ÈD SAINT-QUEINTIN

_____________________________

Un jour, deins l’mois d’octob’, nos étins chez Achil’

Ein train d’ nos amuser ein faisant enn’ manil’ ;

I n avoit Samuel, Edgard et cor mi ;

N feut pon qu’çà vos étonn’.pass nos sons trois amis !

Tout d’un un coeup Edgard i dit : si vos voolez

A l’foir’ èd Saint-Queintin nos irons nos prom’ner ?

Nos allons juer, ein sept, qu’est-c’ qu’i paiera c’ qu’min d’ fer,

L’eut’ i paiera c’diner, èl troisièm’ès dessert ?

Çà y est, qu’nos li disons pi, tu sais, c’est d’bon cœur ;

Teint miux pou c’ti qu’i gainn’ ; ma foi, au tchiot bonheur.

Quant nos ons eu fini, nos allons à la gar’

Pou preinn’ ès train d’trois heur’ ; çà n’étoit pon trop tard !

C’étoit mi qu’èj payoit. J’edmann’ trois va-et vient,

Ou bien d’s aller et retour, c’est l’meum’, pou Saint-Queintin.

Nos arrivons s’su l’foir’. Hé bein ! qu’i dit Edgard,

Ej vos paye à diner, vos savez, mes gaillards.

I nos a fait meinger deux sous d’pomm’ èd terr’ frites.. !

Nos nos sons régalés pass’ qu’is éteint bien cuites.. !

Mi, qu’i fait Samuel, èj vos paye èl dessert :

Pou un sou d’pain d’épice et pi cor un tchiot verr’…

S’coeup là, ein rogolant, nos disons feut sortir ;

Pou n’pon morir èd faim, à Bohain feut r’partir ;

Edgard i dit : m’s amis j’vas vos payer miux qu’çà

Aux veindanges èd Bourgagne ! nos allons eintrer là !

Quant’ nos ein sons sortis, lestés d’enn’ bonn’ boutel’,

Nos n’voyins pu cell’ foir’ tell’meint qu’al étoit bel’ !

Nos ons té à c’théat’ vir’ enn’ grann’ pièc’ qu’in j’oit

Autant qu’èj m’èl rappell’…J’èn sais pu çan qu’ c’étoit… !

Ej sais bien qu’nos ons vu ès tchiot Pigeon d’Montbr’hain,

Meum’ èq nos y ons donné au moins dix pongnées d’main

Eq çà claquoit si fort, èq ces gardiens d’pauliss’

I’s ont dit : arrêtez, in n’einteind pu c’s artiss.

Einfin, nos sons partis, longtemps edvant la fin,

Pou vir’ ces ménag’ries qu’is étint su no qu’min.

Ah ! nos n’n ons vu des ours, des serpeints pi des hions,

Des tigu’, pi des bechos montés su des bâtons !

Nos arins bien eintrés aveuc eux, deins leus cages,

Mains, nos n’ons pon ousé pass qu’is étint seuvages.

Après, nos ons filé tout droit à c’l’ estation.

Ein atteindant no train, sans y fair’ atteintion,

Nos ons cor pris par ci, par là, un tchiot dessert,

Du blanc et pi du noir, du rouge pi du vert ;

Çà nos faisoit canter èd tout’ sort’ èd canchons :

Qué plaisir èq nos ons ! Qué les … goss èq nos fons !

Nos cantiens no bonheur ; nos cantiens les amours ;

N’n avoit pon d’pu héreux qu’nous deins tous l’s aleintours.

Quant’ nos s’avons couch és il étoit d’jà matin….

In n’va pon tous les jours à l’foir’ èd Saint-Queintin !

H.F. Carpentier, Rêveries d’un bohainois, transcription de Marcel Lefèvre