EL GARDIGNIER

____________________________

A Samuel T………

Jè n’ n’ai Reincontré un t’à l’heur’

Qu’i s’ proum’noit aveuc un peingnier.

Ed lon, jèm disois c’est c’facteur ;

Jèm trompois, c’étoit c’gardingnier.

Il alloit deins tou’s ces maisons

Edmander, tout dès pus bell’ voix :

Feut-i d’s articheuts, du cresson

Des bieux tchiots radis, à vos choix.

Allons, madam’, v’là d’la legeum,

Du poret, d’s ongnons, du persil,

Des pomm’ èd terr’, du cél’ri meum’

Pou vos n’homm’, quant i s’fait dèl bil’ ,

J’au oussi des m’lons, du cerfeul,

Des pois, d’s haricots, des navieux

Qui’s ont bel air et pi bon eul ;

In ein meig’roit tant qu’i sont bieux.

Ej l’acoutois fair’ es n atiqu’ ,

Ej m’approche èd li tout douc’meint ;

Ej li dis : tèn’ n as dèl pratiqu’ ,

T’as là un bon métchier sur’meint.

Vas ! qu’i dit, c’est cor comm’ uneut’ ;

Aveuc du feumier, du solel’

Es gardignier n’a pon dès feut’

Si ça n’fait pon pousser c’l’osel’ .

S’i n’a pon d’ qu’veu deins s’n écuri’

Pi qu’i pleuss un tchiot peu su l’soir,

I dit c’est du feumier d’herbi’ ,

Ej n’ai pu b’son dém’n arrousoir.

Oué mains ! ça n’est pon toujours ça.

Quant i fait dèl trop grann’ séqu’ress’

Et pi qu’ès ieu al est fort bas,

I feut qu’i sue comme enn’ négress’.

I trimm’ , i peinn’ , bref i s’esquinte,

I n’arrêt’ èq quant i fait noir ;

Héreu qu’i peut cor boi’ enn’ pinte

Qu’i met d’ côté deins s’n eintonnoir.

Comme i m’parloit v’là justemeint

Un vaniteux, qu’i n’est pon sourd,

Qu’i passoit juste au meum’ monmeint ;

Ein nos voyant vite il accourt.

T’as des yux l’perdition dèt’ n âm’ ,

Qu’i dit, veinard èd gardignier ;

Ti qu’ t’es toujours aveuc ces fam’

Deins cell’ cave ou bien deins c’ guergnier,

Quoi qu’ c’est qu’ tu m’off, dis mèl lé ? dis ?

Tchiens, j’vas t’offrir enn’ bell’ citroull’ ,

C’est tin portrait ; n’dis pon qu’ c’est d mi,

Et’ fam’ al t’appel’roit niqu’doull.

H.F. Carpentier, Rêveries d’un bohainois, transcription de Marcel Lefèvre