L’ Hotel èd ville

Bohain i peut n’n êt fier èd sin hôtel èd vill’.

C’est bieu tout jusqu’ein heut, d’où qu’in domine èl vill’ !

Sans voloir dir’ qu i r’sann’ à l’maison d’préfecture,

In diroit, quasimeint, enn’ tchiot’ sous-préfecture.

Ein eintrant, c’est c’concierge ; s il est deins sin log’meint,

I vos reinseinn’ toujours vite et pi polimeint.

A geuche c’est c’commissaire et pi ses eimplo-yés

Qu’i vos fourr’t au vieulon quant’ in l’s a tutoyés

A côté c’est marqué : greffier dès jug’ èd paix.

Su cell’ porte èd pu lon cé écrit : jug’ èd paix.

El justice, ell’, al s’reind d’l’eut’ côté dès couloir

Doù ès qu’in n’voit pon clair, doù ès qu’i fait tout noir ;

I paroit qu’in einteind, aveuc tou’ les formu’,

Candaimner ces plaideus qu i crient comm’ des tchiot’ mul’.

In a cor enn’ grann’ pièce pou ces répétitions

Ed tous ces musiciens, ces tambours, ces clairons.

Aud’bout dès colidor, c’est çou qu’in nomm’ cell’ cour ;

Si in veut i preinn’ l’air, in a bientôt fait l’tour.

In montant c’l’esca-yé, n a cell’ bibliothèque’

Su reingée qu’in diroit un bureu d’hypothèqu’.

In monte cor un tchiot peu pi in arriv’ ein heut ;

Ila, tout comm’ein bas, i n a tout çou qu’i feut.

N a d’abord enn’ bell’ place esposée au solel,

C’est là qu’èd temps en temps, i s’réunit l’conseil

Pi qu’in fait ces grands keup, èj veux dir’ ces mariages,

Des jonnn’ et pi des viux, einfin èd tous les âges.

In l’s einteind toujours dir’ : Oué ! qu’in n’ieu d’mann’ errien ;

I’s ont toujours si peur èq : nan ! çà n’vale errien.

Et cabinet dès maire il est là su c’pa-yé,

Un tchiot peu reinfoncé à droit’ dès l’esca-yé.

Ein face c’est cell’ mairie. In y va déclarer

Enn’ bell’ mère, ein pareint, qui n saitt’ pus racaler ;

In dit oussi quès s’famm al vos donn’ un moutard :

Un fiu ou bien enn’ fil’ qu’in atteindoit qu’pus tard !

Au fond c’est cell’ guérit’ dès caissier communal

Qu’i r’çoit tous ces impôts dus pou l’municipal.

Mais çan qui n a d’pus bien , c’est cell’ grann’ dall’ des fêt’

Aveuc sin bieu papier, ses lust’ pi ses banquett’.

In y est quasi saisi quant in pass’ à cell’ port’ ;

In trann’ èd tous ses memb’ et pi in r’seint d’tout’ sort’ ;

C’est là qu’in fait quitt’ fois des réugnons publiqu’ !

In dit des meinteries pass’ qu’in pa’l politiqu’ !

In y donn’ des Concerts – in pet bien l’publier-

Pou ces pauv’ èd Bohain, qui n’feut pon oublier.

Pus heut i n a des oièces doù ès qu’in fait ces cours

Pou ceux qui veut t s’instruire pi aller au concours.

Cor pu heut c’est c’guergnier et pi, pad’sus, c’beffroi

Qu’i possèd ‘ enn’ bell’ cloqu’ qual vos donn’ èd l’effroi.

I n a cor ès l’horloge aveuc ses trois cloquettes

Qu’al sonn’ à tous ces quarts, pi à ces heur’s complètes.

Pi n a cell’ pointe èd fer, qu’al dress’ su c’batimeint,

Pou y accrocher c’drapieu les jours èd conteint’meint ;

Tous ces corps èd métchiers i sont su c’l’edvanture,

Pi l’s armoiries dèl vill’ fait aveu’ d’l’esculpture ;

In a gravé pa d’sous, c(l’edvise d’enn main adroite :

A geuche Pro Patria, IN FINIBUS à droite.

Vos voyez bien, à c’t’heur’, par çan qu’èj vos ai dit,

Qu’ c’est l’pus bieu monumeint qu’i n a deins no pays.

H.F. Carpentier, Rêveries d’un bohainois ; transcription de Marcel Lefèvre