A C’ CAMP DES OISEUX

______________________

A Aimé A…..

Su c’ qu’min d’ Bus’gné, là bas ein heut,

In aperçoit c’ camp des oiseux.

C’est enn’ bell’ tchiot’ maison proprett’

A c’ coin dès bos, pon lon d’ Becqu’gnett’

Çà n’est pon, non pu, lon d’ Bohain

Puss qu’in y va sans preinn’ ès train.

Comm’ c’est un bieu but èd prom’nad’,

Des fois, à l’bras d’un camarad’

In quitt’ volontchiers sin pat’lin

Pou y aller boir’ un tchiot bit’lin ;

Pass c’est un cabar’tchier, c’patron ;

I veind meum du gomm’, du citron.

Bien miux ! c’est qu’ quanr’ in a l’ fringal’

Qu’èl mitant dès panch’ i ferral’,

In peut mier du gambon d’ Becqu’gné,

Vos savez : d’ l’al, èd l’esstaufé ?

Ed min temps in faisoit enn’ fêt’

Quant’ ces feul’ i moutrint leu têt’.

In n’ein fait pu d’parel’ nenn’ part !

In s’y plaisoit, in erv’noit tard,

Surtout qu’pou preinn’ un tchiot peu l’air

Quant’ ès temps il étoit bien clair,

In alloit vir’ si ces noisett’

I poussint su l’pon dèl planquett’ !

Quitt’ fois in preunoit enn’ boutel’

Ed bièr ou bien d’sirop d’grousel’ ;

In l’ tutronnoit su l’bord dès pont,

Si vos savins comm’ c’étoit bon !!

H.F. Carpentier, Rêveries d’un bohainois, transcription de Marcel Lefèvre