CES OUVRIERS TISSEURS

___________________________

Tic et tic et tac, tic et tic, tac , taclac.

C’est un r’frain qu’in einteind toujours bien volontiers

Quant’ in a passé s’vie, quasi, sur des métchiers.

Tic et tac kiss, kiss ; tic et tac kiss, taclac.

Ces ouvriers tisseurs peinss’ t i à çou qu’i sont ?

San eux quoi qu’in d’viendroit ? In s’roit nu comme un ver ;

In s’roit cuit deins l’été , gélé d’ froid deins l’ hiver

I n’ gain’tent pon grand cose pourtant pou çan qu’i font.

A cinq heur’ du matin i s’éjeuv’t tous les jours ;

Pa’ l’ pleuve ou bien pa’ l’ neige i s’ein vont travailler,

Quitt’ fois i boiv’t enn’ goutt’ pour ès décafiller,

Mais pour l’heur’ dèl reintrée i’s arriv’tent toujours.

I ieu feut dèl leumièr, i’s ein trouv’tent sans bruit.

Deins l’temps i s’éclairint aveuc leu tchiot quinquet ;

Aujord’hui c’est du gaz, èd l’electricité,

Qu’in diroit qu’i fait jour, meume au mitant dèl nuit.

I s’assit’t à leu place, i d’ mett’ à leu n’ouvrage :

Tic et tac, tic et tac, tic et tic et tac ;

Ces battants, ces einsup’, ces lam’ , i feut qu’ça claqu’

Ein meum’ temps qu’ces navett’ , ces pein’ pi c’ l’eintourage.

A huit heur’ i déjeun’ t du fromage’ pi du pain

Qu’i ‘s apport’ , bien souveint pour èn pon s’ein r’tourner,

Pass’ qu’i n’ont qu’enn’ mi-heur’. I meing(t sans s’ertourner

Aveuc enn’ tchiot’ bouchie arrous »e d’ieu sans vin.

I’s ont un peu pus d’temps quant’ à douze heur’ i dinn’t,

I r’vont à leu maison s’erposer un monmeint,

I r’qu’ meinch’t à travailler ein cantant djabelmeint :

Tic et tic, tic et tac ; pi à cinq heur ‘ i r’chinn’t.

Einfin, quant’ à huit heur’ i finitt’ leu journée,

I’s arrêt’ leu metchier, leu mécaniqu’ Jacquard,

Ein disant feut reintrer, leuarrou il est tard,

In va s’caler d’aplomb pi dormir enn’ tournée.

Jèn sais^pon çou qu’i faitt’ quant’ i sont deins leu sac.

S’i traval’t ein rêvant , i traval(t à l’ muett

Pass’ qu’in n’ les einteind pu fair’ marcher leu navett’ !

Tic et tac Kiss, Kiss, Kiss ; tic et tac Kiss , taclac !

H.F. Carpentier, Rêveries d’un bohainois ; transcription de Marcel Lefèvre