EL BON D’POSTE

__________________________

Enn’ fois sorti d’ l’écol’ primair’,

Cmm’ èj n’étois pon un coloss’ ,

J’ai eintré à l’mon d’un notair’

Pou n’pon qu’in m’mess tout droit deins l’foss’.

Tout d’suit’, comm’ dé bien einteindu,

Ces clercs dit’t, aud’bout dèl journée,

Qu’i folloit qu’èj paiss èm bienv’nue.

Jèl’s ai régalés d’enn’ tournée.

J’étois s’tchiot clerc , ès seut’ ruisseux ;

Prosper y m’ faisoit einrager.

Ah bein ! qu’èj dis, march’ min crasseux,

Jèn m’ein vas pon m’décourager !

Quitt’ temps après l’Gouvernémeint

Dèl poste il inventoit ces bons ;

Çà fait qu’comm’ çà pu facil’meint

In étoit el preumier d’avril.

Tout d’un coeup j’dis à Prosper :

J’ai b’son d’un bon d’post’ èd famil’ ,

Si tu veux t’iras bien mèl querr.

Ej li donne deux tchiots sous deins s’main

Ein li disant : c » un d’dix fracs.

I soiss posé bien deins c’mitant .

El v’là parti comm’ enn’ gazell’ ;

Feut qu’èj vos dis’ qu’èl directriss’

Al étoit cor à motchié bell‘

Qu’al vooloit qu’ Prosper i s’mariss’.

Donnez mé vit’ un bon d’dix francs,

Qu’i li crie ein ouvrant cell’ porte,

Mettez bien c’cachet deins s’mitant

Ou bien i feura qu’jèl rapporte ?

El directriss’ al l’ergardoit ;

Al li prépar’ sin bon tout d’meum’.

A par ell’ j’sus seur qu’al disoit :

Qué toqué ! dir’ qu’ jèl vois au preum’ !

Al ervient jusqu’à s’tchiot’ fernêt’,

Al i avanc’ sin bout d’papier

Quant al voit èq comm’ enn’ grann’ bête

I li donn’ deux sous pou l’payer.

Aspèce èdfou ! qu’al dit heut’meint

Ein r’freumant fort sin tchiot carrieu…..

Il a r’v’nu, i n’a pon seu qu’meint

A force qu’il étoit fin roupieu.

Jé i ai fait nos payer d’lamer,

Enn’ tournée d’g’niève et pi d’ l’amis,

Pi jè i ai dit : voistu Prosper

I n’feut pu t’moquer d’tes amis !

H.F. Carpentier, Rêveries d’un bohainois, transcription de Marcel Lefèvre