ENN’ CLÉ D’ PRÉCISION

___________

A einteinn’ parler Philémonn’

C’est li l’ meilleur tireu du monn’

Qu’ çà fuss à n’import’ qué fusil,

N’a pon d’erreur, c’est toujours li !

Mains, l’arm’ qu’i manoeuv’ cor èl miux,

C’est l’canon…..d’ bièr’ bier’ bien einteindu .

D’i n’ n’a avalé enn’ vingtainn’

I pal’ tout comm’ un capitainn’ ;

I dit qu’il a enn’ carabine

Qu’i n’n a pon d’pus bell’ ni d’pu fine,

Qu’i y a mis li meum’ un guidon

Pi un cran d’mir’ èd précision.

Quant’ il a s’pronn’ ès n’est pu l’meum’ ;

Pour ça i peut dir’ qu’il est c’preum’ ;

I n’ertrouv’ pu l’treu dès serrure !

I feut cor qu’ès fenm’ al l’eindure

Pi qu’al vienss è i ouvert ès port’.

Sans quoi i li diroit d’ tout’ sort’.

Seul’meint, pon pu longtemps qu’ l’eut’ jour,

Al i a jué un bien bieu tchiot tour.

I r’vient pou diner à s’maison

N’ayeint pon cor perdu s’raison ;

I voit c’serrurier qui tap’ dur

Ein fourguillant à cell’ serrur’.

Quoi qu’vos faisez là ? qu’i li dit.

Es fanm’ al li répond : Pardi,

Puss vos n’savez pu trouver s’treu

Pou mett’ vo clé quant’ vos êtes seu,

Ej li fais mett’ un bieu guidon

Pi un cran d’mir’ èd précision…

Vous qu’vos tirez comm’ i n’n a pon

A l’carabin’…. Meum’ au canon….

Quant’ vos s’rez no-yé deins l’brind’zingue

Vos n’arez pu l’air d’enn’ bastringue ;

Tout du moins , malgrès vo tchiot’ cuite,

Vos trouvérez c’treu là tout de suite !...

H.F. Carpentier, Rêveries d’un bohainois, transcription de Marcel Lefèvre