_________________
Jèm rapelle èq quant’ j’étois tchiot,
J’ainmois monter à roga-yot.
N’avoit tchiot Cha’les qu’i v’noit toujours
Su l’place ou bien deins c’s aleintours ;
Il arrivoit l’sam’di ai soir
Mett’ sin caroussel su c’trottoir
Là bas, pus lon qu’ l’hotel èd vill’.
I n’eimplissoit pont ou cell’ vill’ ;
I n’avoit ein tout qu’six qu’veux d’bos
Taillés à l’serpe, pi un cados
Reimbourré cin cuir èd èd brouette,
Aveux deux places ein tête à tête ;
C’étoit pou mett’ ces amoureux ;
Leus gam’i s’touchint tous les deux.
I n’avoit rien pou l l’acouvrir,
Quant’ i pluvoit seul’meint quitt’ goutt’,
Ces parap’uies s’ouvrint trertout’,
C’étoit drol’ cell’ caval’rie là ;
In riioit d’vire ès l’affair’là.
Cà n’étoit pét-èt pon fort chuette
Mais, quoi qu’vos voolez, c’étoit l’fête !
In n’y r’gardoit pon d’aussi près !
In n’y avoit mis d’côté esprès
Quitt’ sous qu’in gardoit, nom des os,
Pou monter su des selles èd bos.
Pou li fair’ tourner sin ga-yot
Cha’les i faisoit toujours èl tchiot,
N’ayeint pon d’vrai qu’veu. Ces gamins
I s’attélint aveuc leurs mains ;
I poussint tertous tour à tour
Pi i montint chacun leur tour
Fin bien aises, keuo pour errien,
Pass’ qu’in n’leu donnoit pon d’argeint.
Tchiot Cha’les, pou t’attirer sin monn’,
I tirroit d’s agneux dès marronn’ ;
I l’s attachoit à un bâton
Pi i disoit ; ein route ; partons,
Es roga-yot vit’ i tournoit,
Tertout’ einsann’ in li criioit :
A mi ! tchiot Cha’les. A mi la pointe !
Enn’ fiqhe èd fer lilée ein pointe
Deins enn’ main, pi l’eut’ pou s’sou’enir,
Ces agneux n’avint qu’è bien s’t’nir.
In I’s einfiloit l’un après l’eut’.
Ou bien çà n’étoit pon des feut’
Pass’ qu’ès ti qu’i n’n attrapoit l’pus,
Sans payer i montoit bien d’pus.
Si c’n’étoit pon si bien qu’pou l’heur’
In avoit tout d’meum du bonheur ;
Tout du moins, in s’amusoit bien
Et pi in s’ein r’alloit conteint ;
In avoit fait tourner c’ga-yot
Pi monté su tous ces qu’veux bos ?
H.F. Carpentier, Rêveries d’un bohainois ; transcription
de Marcel Lefèvre