EL VÉROCIPÈTE

__________________

Ah ! l’bien vérocipèt’ ! qui dit enn’ fois Ju-yen,

Ein vo-yant l’bell’ machin’ d’sin camarad’ Mi-yen ;

I feudra qu’su c’chos’ là, èj m’appreinss à monter

Rt pi jèn’ ach’t’rai, un joli, sans compter

Bé ! qu’i répond Mi-yen, si tu veux j’vas t’appreinn’ ;

Nos irons su c’ q’min d’Guise pi tu mont’ras d’sus l’mienn’ ;

I feut un bieu terrain çà c’est l’point capital.

Les v’là partis à deux , tout près dès l’hopital ;

Su cell’ sell’ min Ju-yen i s’assit tranquil’meint ;

L’eut’ i s’met pardrière pi i l’pouss’ tout douc’meint ;

Aud’bout d’enn’ heur’ d’elçons ça alloit cor assez,

Ju-yen i n’avoit pon cor raplati sin nez !

I cœur vit’ chez c’ marchand querr un véricipète

Pi i r’vient, ein rêvant d’aller tout d’ qu’à l’Marlette.

I n’fait ni enn’ ni deux, il ermonte sur s’ machin’

Aud’bout d’un momeint il arriv’, i déqueind

Ein d’mandant enn’ canett ‘ ; il étoit si conteint !

I n’a meum’ pon pris l’temps d’aller jusqu’à c’ l’ ermise

Quoi qu’il etoit ein nage, qu’in i aroit tordu d’ qu’mise.

I r’mont ed su s’ machin’. Juss v’là c’kien qu’i s’éjette

Pa d’sous cell’ reue d’ pa d’vant èd sin vérocipète.

Ju-yen i piqu’ enn’ têt’; sur velle rout’ i s’étal’ ;

Es kien i n’atteind pon, au pu vit’ i détal’ ;

Mains c’qu’veu d’fer i s’avoit tordu et pi r’ plo-yé ;

I étoit démoli, tout il étoit bro-yé ;

Ah bein ! qu’i pial’ Ju-yen, èm v’là deins des bieux draps !

Sapré kien, c’estdèt feut’, mains, march’, tu m’èl paieras

Sale étranné à mouqu’, sal’ meingé à calennes !

Tu méritrois qu’èjt faiss’ envo-yer à Cayenne !

Il avoit bieu crier et pi seuter ein n air,

I folloit s’ein r’aller, c’est çà qu’ c’étoit l’pu clair.

I a r’bu un tchiot verr’, il a r’parti tout d’suite,

Il avoit peur qu’ès kien i s’ mess’ cor à s’ poursuite.

Il étoit r’arrivé quasi à c’l’ Ermitage

Eq v’là qu’i tmm’ dèl pleuve et qui fait d’l’orage ;

Çà versoit, nom des os, à l’verse, j’èn vos dit qu’çà !

Ju-yen i dit : v’là l’ reste, i n’èm manquoit pu qu’çà !

Quant’ il a r’vu Mi-yen i y a conté s’n histoire

Ein li disant : Tu sais, j’èn veux pon m’ein fair’ gloire ;

Tout çan qu’j’ ergrett’ el pus c’ n’est ni c’ l’orage ni pleuve,

C’est min véricipète. Enn’ si bell’ machin’ neuve !

Ej n’ein rachét’rai un, mains, j’jure su cell’ sonnette

Qu’èj n’irai pu janmais du côté dèl Marlette.

H.F. Carpentier, Rêveries d’un bohainois, transcription de Marcel Lefèvre